Desk | Nagpur

नागपुरातील 17 शाळांना बॉम्बस्फोटाची धमकी; चार शाळा बंद, पोलिसांकडून डॉग स्क्वॉडच्या मदतीने तपास सुरू  नागपूरमध्ये शाळांना बॉम्बस्फोटाची धमकी देण्यात आल्याने खळबळ उडाली आहे. शहरातील तब्बल 17 शाळांना धमकीचा ई-मेल प्राप्त झाल्यानंतर नागपूर पोलिसांनी सुरक्षेच्या दृष्टीने मोठी खबरदारी घेतली आहे. धमकीच्या पार्श्वभूमीवर चार शाळांमध्ये आज सुट्टी जाहीर करण्यात आली असून, काही शाळांमध्ये ऑनलाइन वर्ग घेण्याचा निर्णय घेण्यात आला आहे. मिळालेल्या माहितीनुसार, 19 ऑगस्ट रोजी नागपुरातील विविध शाळांना धमकीचा ई-मेल पाठवण्यात आला होता. या ई-मेलमध्ये शाळांमध्ये बॉम्बस्फोट घडवून आणण्याची धमकी देण्यात आल्याची माहिती समोर आली आहे. या धमकीनंतर पोलिसांनी संपूर्ण प्रकरण गांभीर्याने घेत शाळांच्या सुरक्षेची तपासणी सुरू केली आहे. आज धमकीची डेडलाईन असल्याने नागपूर पोलिसांकडून शहरातील संबंधित शाळांमध्ये विशेष तपासणी मोहीम राबवली जात आहे. पोलिसांचे पथक तसेच बॉम्ब शोधक व नाशक पथक आणि डॉग स्क्वॉडच्या मदतीने शाळेच्या परिसराची बारकाईने तपासणी केली जात आहे. शाळांच्या इमारती, वर्गखोल्या, परिसर आणि इतर संवेदनशील ठिकाणी पोलिसांकडून पाहणी केली जात आहे. प्रत्येक शाळेत पोलिसांचे वाहन आणि पथक पोहोचले असून, कोणतीही संशयास्पद वस्तू किंवा हालचाल आढळते का, याची तपासणी केली जात आहे. धमकीच्या पार्श्वभूमीवर 17 शाळांपैकी चार शाळा आज बंद ठेवण्यात आल्या आहेत. यातील दोन शाळांमध्ये विद्यार्थ्यांचे शैक्षणिक नुकसान होऊ नये म्हणून ऑनलाइन पद्धतीने वर्ग घेण्याचा निर्णय घेण्यात आल्याची माहिती आहे. विद्यार्थ्यांची आणि पालकांची सुरक्षितता लक्षात घेऊन शाळा प्रशासनाकडून आवश्यक ती खबरदारी घेतली जात आहे. दरम्यान, शाळा प्रशासनाकडून माध्यमांना शूटिंगची परवानगी देण्यात येत नसल्याचेही समोर आले आहे. मात्र, पोलिसांकडून सुरक्षेची तपासणी सुरू असून, परिस्थितीवर बारकाईने लक्ष ठेवण्यात येत आहे. या धमकीच्या ई-मेलमागे नेमका कोणाचा हात आहे, हा ई-मेल कुठून पाठवण्यात आला आणि धमकी देण्यामागचा उद्देश काय होता, याचा तपास पोलिसांकडून सुरू

आहे. सायबर यंत्रणांचीही मदत घेतली जात असल्याची शक्यता आहे. सध्या तरी शाळांमध्ये कोणतीही संशयास्पद वस्तू आढळल्याची माहिती समोर आलेली नाही. मात्र, धमकीची गंभीरता लक्षात घेता पोलिसांकडून कोणतीही जोखीम घेतली जात नाही. विद्यार्थ्यांच्या सुरक्षेला सर्वोच्च प्राधान्य देत प्रत्येक संबंधित शाळेत तपासणी केली जात आहे.  नागपूरमधील 17 शाळांना मिळालेल्या या धमकीच्या ई-मेलमुळे पालकांमध्येही चिंता निर्माण झाली आहे. पोलिसांच्या तपासानंतर या धमकीमध्ये कितपत तथ्य आहे आणि हा ई-मेल नेमका कोणी पाठवला, याचा खुलासा होण्याची शक्यता आहे.