Desk | Amravati

अमरावतीत विद्यार्थ्यांच्या खोलीत चोरी; गुन्हे शाखेने दोन आरोपींना अटक, 1.68 लाखांचा मुद्देमाल जप्त अमरावती शहरातील गाडगेनगर पोलीस ठाण्याच्या हद्दीत स्पर्धा परीक्षांची तयारी करणाऱ्या विद्यार्थ्यांच्या खोलीत चोरी करणाऱ्या दोन आरोपींना गुन्हे शाखेच्या पथकाने अटक केली आहे. या कारवाईत पोलिसांनी दोन लॅपटॉप, चार मोबाईल आणि एक हिरो स्प्लेंडर मोटरसायकल असा एकूण 1 लाख 68 हजार रुपयांचा मुद्देमाल जप्त केला आहे. मिळालेल्या माहितीनुसार, फिर्यादी प्रतीक्षा शिरपूरकर या शिक्षणासाठी अमरावतीच्या गाडगेनगर परिसरात भाड्याच्या खोलीत राहत होत्या. 11 मे 2026 रोजी त्यांच्या खोलीत अज्ञात चोरट्याने प्रवेश करून दोन लॅपटॉप आणि तीन मोबाईल हँडसेट असा मौल्यवान ऐवज चोरून नेला होता. या घटनेनंतर गाडगेनगर पोलीस ठाण्यात अज्ञात आरोपीविरोधात चोरीचा गुन्हा दाखल करण्यात आला होता. चोरीचा गुन्हा दाखल झाल्यानंतर गाडगेनगर पोलिसांसह गुन्हे शाखेचे पथकही या प्रकरणाचा समांतर तपास करत होते. आरोपींचा शोध घेण्यासाठी पोलिसांकडून विविध दिशेने तपास सुरू होता.

दरम्यान, 18 ऑगस्ट रोजी गुन्हे शाखेच्या पथकाला आरोपींबाबत गोपनीय माहिती मिळाली. या माहितीच्या आधारे पोलिसांनी इतवारा बाजार परिसरात सापळा रचला. या कारवाईत निखिल ताठे (वय 21, रा. महेंद्र कॉलनी) याला ताब्यात घेण्यात आले. पोलिसांनी त्याची कसून चौकशी केली असता त्याने चोरीच्या गुन्ह्याची कबुली दिल्याची माहिती पोलिसांनी दिली. तसेच चोरी केलेला मुद्देमाल विक्रीसाठी शेख नजीर शेख कदीर (वय 29, रा. जमीला नगर) याच्याकडे ठेवला असल्याचेही चौकशीत समोर आल्याचे सांगण्यात आले. त्यानंतर पोलिसांनी दुसऱ्या आरोपीलाही ताब्यात घेतले. दोन्ही आरोपींकडून पोलिसांनी दोन लॅपटॉप आणि चार मोबाईल हँडसेट जप्त केले. याशिवाय चोरीच्या प्रकरणाशी संबंधित एक हिरो स्प्लेंडर मोटरसायकलही पोलिसांनी ताब्यात घेतली आहे. जप्त करण्यात आलेल्या मुद्देमालाची एकूण किंमत 1 लाख 68 हजार रुपये असल्याचे पोलिसांनी सांगितले. स्पर्धा परीक्षांची तयारी करणाऱ्या विद्यार्थ्यांच्या खोलीतून मौल्यवान वस्तू चोरीला गेल्याने परिसरात काही काळ चिंता निर्माण झाली होती. मात्र, गुन्हे शाखेच्या तपासामुळे चोरीचा छडा लावत दोन संशयित आरोपींना अटक करण्यात आली आहे. ही कारवाई अमरावती शहर पोलीस आयुक्तांच्या मार्गदर्शनाखाली गुन्हे शाखेच्या पथकाने केली. या प्रकरणाचा पुढील तपास गाडगेनगर पोलीस करत असून, आरोपींकडून आणखी काही चोरीच्या घटनांची माहिती मिळते का, याचा तपासही पोलिसांकडून केला जात आहे.