Desk | Nagpur

मतदार यादीच्या विशेष सखोल पुनरिक्षणाच्या (SIR) प्रक्रियेतून पात्र मतदारांची नावे मतदार यादीतून वगळली जात असल्याचा आरोप करत काँग्रेस कार्यकर्त्यांनी नागपुरात मुख्य निवडणूक आयुक्त ज्ञानेश कुमार यांच्या विरोधात जोरदार आंदोलन केले. संविधान चौकातून जिल्हाधिकारी कार्यालयाच्या दिशेने मोर्चा काढत काँग्रेस कार्यकर्त्यांनी निवडणूक प्रक्रियेवर प्रश्न उपस्थित केले. यावेळी ज्ञानेश कुमार यांच्या प्रतीकात्मक पुतळ्याचे दहन करून संतप्त कार्यकर्त्यांनी आपला निषेध व्यक्त केला. काँग्रेस कार्यकर्त्यांच्या म्हणण्यानुसार, SIR प्रक्रियेच्या माध्यमातून पात्र मतदारांची नावे मतदार यादीतून वगळली जात असल्याचा गंभीर प्रकार सुरू आहे. त्यामुळे सामान्य नागरिकांच्या मतदानाच्या अधिकारावर परिणाम होण्याची शक्यता असल्याचा आरोप काँग्रेसकडून करण्यात आला. निवडणूक प्रक्रियेत पारदर्शकता आणि निष्पक्षता राखणे आवश्यक असताना मतदारांच्या नावांबाबत अशा प्रकारचे निर्णय घेतले जात असल्याचा दावा आंदोलनकर्त्यांनी केला. नागपुरातील संविधान चौक परिसरात काँग्रेस कार्यकर्ते मोठ्या संख्येने एकत्र आले. हातात फलक आणि घोषणाबाजी करत कार्यकर्त्यांनी मुख्य निवडणूक आयुक्त ज्ञानेश कुमार यांच्या भूमिकेचा निषेध केला. यावेळी आंदोलनकर्त्यांनी ज्ञानेश कुमार हे SIR

प्रक्रियेच्या माध्यमातून भाजपला मदत करत असल्याचा आरोप केला. त्यांच्या निर्णयांमुळे लोकशाही व्यवस्थेला धोका निर्माण होत असल्याचेही काँग्रेस कार्यकर्त्यांनी म्हटले. आंदोलनादरम्यान कार्यकर्त्यांनी ज्ञानेश कुमार यांच्या प्रतीकात्मक पुतळ्याचे दहन केले. पोलिसांनी आंदोलनकर्त्यांना रोखण्याचा प्रयत्न केला. त्यामुळे काही काळ परिसरात तणावाचे वातावरण निर्माण झाले. पोलिस आणि काँग्रेस कार्यकर्त्यांमध्ये धक्काबुक्कीही झाल्याचे चित्र पाहायला मिळाले. मात्र, कार्यकर्त्यांनी आपला निषेध सुरूच ठेवत जोरदार घोषणाबाजी केली. “ज्ञानेश कुमार देशद्रोही आहेत, त्यांना अटक करा,” अशी मागणी यावेळी काँग्रेस कार्यकर्त्यांकडून करण्यात आली. लोकशाही आणि मतदारांच्या अधिकारांचे रक्षण करण्यासाठी मुख्य निवडणूक आयुक्तांनी तातडीने राजीनामा द्यावा, अशी मागणीही आंदोलनकर्त्यांनी केली. काँग्रेसच्या कार्यकर्त्यांनी जिल्हाधिकारी कार्यालयाकडे मोर्चा नेत प्रशासनासमोर आपली भूमिका मांडली. मतदार यादीतील पात्र नागरिकांची नावे कोणत्याही कारणामुळे वगळली जाऊ नयेत आणि प्रत्येक पात्र नागरिकाला मतदानाचा अधिकार मिळाला पाहिजे, अशी भूमिका आंदोलनकर्त्यांनी मांडली. या आंदोलनामुळे नागपुरात निवडणूक प्रक्रियेवरून राजकीय वातावरण पुन्हा तापले आहे. SIR प्रक्रियेवर काँग्रेसकडून सातत्याने आक्षेप घेतले जात असून, याच मुद्द्यावरून नागपुरात करण्यात आलेल्या या आंदोलनातून पक्षाने निवडणूक आयोगाविरोधातील आपला आक्रमक पवित्रा स्पष्ट केला आहे.