Join us
Desk | akola
अकोल्यातील हरिहरपेठेत दोन गटांत वादानंतर दगडफेक; पोलिसांचा मोठा बंदोबस्त अकोला : अकोला शहरातील हरिहरपेठ परिसरातील सानखा प्लॉट भागात दोन गटांमध्ये झालेल्या किरकोळ वादाला काही वेळातच दगडफेकीचे स्वरूप आले. या घटनेमुळे परिसरात काही काळ तणावाचे वातावरण निर्माण झाले होते. दरम्यान, पोलिसांनी तातडीने घटनास्थळी धाव घेत परिस्थिती नियंत्रणात आणली असून सध्या परिसरात शांतता असल्याची माहिती पोलिसांकडून देण्यात आली आहे. मिळालेल्या माहितीनुसार, हरिहरपेठ परिसरात दोन गटांमध्ये आपापसातील वादातून सुरुवातीला किरकोळ भांडण झाले. त्यानंतर परिस्थिती चिघळली आणि दोन्ही गटांकडून एकमेकांवर दगडफेक करण्यात आल्याचे सांगण्यात येत आहे. या दगडफेकीमध्ये दोन ते तीन वाहनांचे नुकसान झाल्याची प्राथमिक माहिती समोर आली आहे. मात्र, या घटनेत कोणतीही व्यक्ती जखमी झाल्याचे समोर आलेले नाही. घटनेची माहिती मिळताच पोलिसांनी तातडीने हरिहरपेठ परिसरात पोहोचून परिस्थिती नियंत्रणात आणली. संभाव्य अनुचित प्रकार टाळण्यासाठी परिसरात मोठा पोलीस बंदोबस्त तैनात करण्यात आला आहे. आरसीपी पथकाचीही तैनाती करण्यात आल्याची माहिती पोलिसांकडून देण्यात आली आहे. त्यामुळे परिसरातील परिस्थितीवर पोलिसांकडून बारकाईने लक्ष ठेवले जात आहे. दरम्यान, या प्रकरणात काही जणांना पोलिसांनी ताब्यात घेतले असून इतर संबंधित व्यक्तींचा शोध सुरू असल्याची माहिती समोर आली आहे. पोलिसांकडून पुढील कायदेशीर कारवाई सुरू असून, घटनेमागील नेमका वाद आणि त्यानंतर दगडफेक कशी झाली, याचा तपास केला जात आहे. पोलिसांच्या माहितीनुसार, हा प्रकार कोणत्याही बाहेरील कारणामुळे नसून दोन गटांमधील आपापसातील वादातून घडल्याचे प्राथमिक तपासात समोर आले आहे. उपलब्ध माहितीनुसार, दोन्ही गटांतील व्यक्तींमध्ये झालेल्या वादानंतर दगडफेक झाली आणि त्यानंतर पोलिसांनी तातडीने हस्तक्षेप केला. घटनेनंतर हरिहरपेठ परिसरात सध्या परिस्थिती नियंत्रणात असून शांतता आहे. नागरिकांनी अफवांवर विश्वास ठेवू नये, तसेच सोशल मीडियावरून पसरवल्या जाणाऱ्या कोणत्याही अप्रमाणित माहितीवर विश्वास ठेवू नये, असे आवाहन पोलीस प्रशासनाकडून करण्यात आले आहे.
दरम्यान, परिसरात मोठा पोलीस बंदोबस्त कायम ठेवण्यात आला असून, परिस्थिती पुन्हा चिघळू नये यासाठी पोलिसांकडून आवश्यक ती खबरदारी घेतली जात आहे. या घटनेप्रकरणी पुढील तपास आणि कारवाई सुरू आहे.
