Desk | amravati

पूर्णानगरात अवैध गोवंश कत्तलीचा पर्दाफाश; सात जण अटकेत, 13.77 लाखांचा मुद्देमाल जप्त अमरावती ग्रामीण : अमरावती ग्रामीण पोलीस अधीक्षक कार्यालयाच्या स्थानिक गुन्हे शाखेने भातकुली तालुक्यातील पूर्णानगर येथील कसाबपुरा परिसरात धाड टाकून अवैध गोवंश कत्तलीचा पर्दाफाश केला आहे. पोलिसांनी केलेल्या या कारवाईत तब्बल सात जणांना अटक करण्यात आली असून, त्यांच्याकडून गोमांस, जिवंत गोवंश, गोवंशाची कातडी, कत्तलीचे साहित्य, रोख रक्कम तसेच तीन मालवाहू वाहने असा एकूण 13 लाख 77 हजार 600 रुपयांचा मुद्देमाल जप्त करण्यात आला आहे. स्थानिक गुन्हे शाखेला पूर्णानगर येथील कसाबपुरा भागात अवैधरीत्या गोवंशाची कत्तल केली जात असल्याची माहिती मिळाली होती. या माहितीच्या आधारे पोलिसांच्या पथकाने संबंधित ठिकाणी धाड टाकली. अचानक करण्यात आलेल्या या कारवाईमुळे परिसरात खळबळ उडाली. पोलिसांनी केलेल्या तपासणीदरम्यान घटनास्थळावर मोठ्या प्रमाणात गोमांस आढळून आले. यामध्ये 830 किलो गोमांस, दोन जिवंत गोवंश, 31 किलो गोवंशाची कातडी, तसेच कत्तलीसाठी वापरण्यात येणारे साहित्य जप्त करण्यात आले. याशिवाय तराजू, कुऱ्हाड आणि इतर साहित्य तसेच रोख रक्कमही पोलिसांनी ताब्यात घेतली. या कारवाईत तीन मालवाहू वाहनेही जप्त करण्यात आली असून, वाहनांची किंमत सुमारे 9 लाख रुपये असल्याचे सांगण्यात आले आहे. या संपूर्ण कारवाईत पोलिसांनी जप्त केलेल्या मुद्देमालाची एकूण किंमत 13 लाख 77 हजार 600 रुपये असल्याची माहिती समोर आली आहे. कारवाईनंतर पोलिसांनी सात संशयित आरोपींना ताब्यात घेत त्यांच्यावर कायदेशीर कारवाई सुरू केली आहे. अटक करण्यात आलेल्या आरोपींमध्ये मोहम्मद जावेद प्यारे (23), मोहम्मद एजाज शेख ईसा (40), अब्दुल मोबिन अब्दुल करीम (45), अब्दुल कदीर शेख युसुफ (48), अंसार अब्दुल लतीफ (50), मकसूद अहमद बशीर अहमद (50) आणि अब्दुल कलाम अब्दुल जब्बार (52) यांचा समावेश आहे. हे सर्व आरोपी कसाबपुरा, पूर्णानगर परिसरातील रहिवासी असल्याचे पोलिसांनी सांगितले. या प्रकरणी आरोपींविरोधात आसेगाव पोलीस ठाण्यात महाराष्ट्र प्राणी संरक्षण अधिनियम, प्राण्यांवरील क्रूरता प्रतिबंधक कायदा तसेच भारतीय न्याय संहितेतील विविध कलमांनुसार गुन्हा दाखल करण्यात आला आहे. प्रकरणाचा पुढील तपास आसेगाव पोलीस ठाण्याकडून करण्यात येत आहे. ही कारवाई पोलीस अधीक्षक निकेतन कदम आणि अप्पर पोलीस अधीक्षक दत्ता तोटेवाड यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक अशोक लांडे यांच्या नेतृत्वाखालील पथकातील पोलीस अंमलदारांनी ही धडक कारवाई यशस्वीरीत्या पार पाडली. अवैध गोवंश कत्तलीविरोधात पोलिसांनी केलेल्या या कारवाईमुळे परिसरात खळबळ उडाली असून, या प्रकरणामागे आणखी कोणाचा सहभाग आहे का, याचाही तपास पोलीस करत आहेत.