Desk | Yavatmal

iPhone 16 Pro घेण्याच्या हव्यासापोटी नातवानेच आजोबांच्या घरात केली चोरी; ₹6.72 लाखांचे सोने जप्त यवतमाळ जिल्ह्यातील वणीमध्ये चोरीचा एक धक्कादायक प्रकार समोर आला आहे. iPhone 16 Pro खरेदी करण्याच्या इच्छेपोटी एका अल्पवयीन मुलाने चक्क आपल्या आजोबांच्याच घरात चोरी केल्याचा प्रकार उघडकीस आला आहे. घरातील लोखंडी कपाटाच्या लॉकरमधून तब्बल 52 ग्रॅम सोन्याचे दागिने चोरी करण्यात आले. या सोन्याची किंमत सुमारे 6 लाख 72 हजार रुपये असल्याचे सांगण्यात येत आहे. मात्र, वणी पोलिसांनी तत्परतेने तपास करत चोरीचा संपूर्ण मुद्देमाल जप्त केला आहे. मिळालेल्या माहितीनुसार, वणी शहरातील कनकवाडी परिसरात बंडू विठोबा बोटाले यांच्या घरात 20 ते 21 ऑगस्टच्या मध्यरात्री चोरी झाली होती. घरातील लोखंडी कपाटाच्या लॉकरमध्ये ठेवलेले 52 ग्रॅम सोन्याचे दागिने गायब झाल्याचे कुटुंबीयांच्या लक्षात आले. त्यानंतर याप्रकरणी वणी पोलिसांत तक्रार दाखल करण्यात आली. तक्रार मिळताच वणी

पोलिसांनी चोरीच्या घटनेचा तपास सुरू केला. घरातील परिस्थिती आणि उपलब्ध माहितीच्या आधारे पोलिसांनी तपासाची चक्रे वेगाने फिरवली. तपासादरम्यान या चोरीमागे कुटुंबातीलच एका अल्पवयीन मुलाचा सहभाग असल्याचे समोर आले. पोलिसांच्या माहितीनुसार, या अल्पवयीन मुलाला iPhone 16 Pro खरेदी करायचा होता. महागडा मोबाईल घेण्याची इच्छा पूर्ण करण्यासाठी त्याने चोरी करण्याचा निर्णय घेतल्याचे सांगण्यात येत आहे. त्याने आपल्या काही मित्रांना याबाबत सांगितले होते. पोलिसांच्या म्हणण्यानुसार, मित्रांनी त्याला चोरी करण्यासाठी प्रवृत्त केल्याचा संशय आहे. यानंतर अल्पवयीन मुलाने आजोबांच्या घरातील कपाटाची चावी वापरून लॉकर उघडला आणि त्यामधील सोन्याचे दागिने काढून घेतले. चोरी केल्यानंतर हे सोने विकून मिळणाऱ्या पैशातून iPhone 16 Pro खरेदी करण्याची तयारी असल्याचे तपासात समोर आले. दरम्यान, चोरी केलेले सोने विकण्यासाठी अल्पवयीन मुलगा आणि गुणवंत उर्फ पोलार्ड दानव हे चंद्रपूर किंवा नागपूरला जाण्याच्या तयारीत होते. मात्र, त्याआधीच पोलिसांनी दोघांना ताब्यात घेतले. पोलिसांनी त्यांच्याकडून 25 ग्रॅम वजनाचा सोन्याचा हार, गोप आणि कानातील टॉप्स, अशा विविध दागिन्यांसह एकूण 52 ग्रॅम सोने जप्त केले आहे. जप्त केलेल्या सोन्याची किंमत सुमारे ₹6 लाख 72 हजार असल्याचे सांगण्यात येत आहे. या प्रकरणातील सूरज हुसैन गडाम या अन्य संशयिताचा शोध सध्या सुरू आहे. चोरीच्या कटात आणखी कोणाचा सहभाग आहे का, याचाही तपास पोलिसांकडून केला जात आहे. महागडा मोबाईल खरेदी करण्याच्या हव्यासापोटी अल्पवयीन मुलाने आपल्या आजोबांच्याच घरात चोरी केल्याने या घटनेची परिसरात जोरदार चर्चा सुरू आहे. या प्रकरणामुळे तरुणांमध्ये वाढत चाललेले महागड्या गॅझेट्सचे आकर्षण आणि त्यासाठी चुकीच्या मार्गाचा अवलंब करण्याचा धोका पुन्हा एकदा समोर आला आहे.