Join us
Desk | Yavtmal
यवतमाळ जिल्ह्यातील हजारो शेतकरी आजही पिकविमा योजनेच्या लाभापासून वंचित असून, त्यांच्या न्याय्य हक्कासाठी काँग्रेसचे ज्येष्ठ नेते व आमदार विजय वडेट्टीवार यांनी विधानभवनाच्या पायऱ्यांवर आमदार बाळासाहेब मांगुळकर आणि इतर सहकाऱ्यांसह जोरदार आंदोलन केले. या आंदोलनाची दखल घेत राज्याचे कृषिमंत्री दत्तात्रय भरणे यांनी व्हिडिओ कॉलद्वारे आंदोलनकर्त्यांशी संवाद साधत लवकरात लवकर रखडलेल्या पिकविमा प्रकरणावर निर्णय घेण्याचे आश्वासन दिले. त्यानंतर आंदोलन तात्पुरते स्थगित करण्यात आले. यावेळी विजय वडेट्टीवार यांनी सांगितले की, “यवतमाळसह राज्यातील अनेक भागांमध्ये शेतकऱ्यांचे मोठ्या प्रमाणात नुकसान झाले आहे. नैसर्गिक आपत्ती, अवकाळी पाऊस आणि इतर संकटांचा सामना करत असतानाही अनेक पात्र शेतकरी पिकविमा मिळण्यापासून वंचित आहेत. ही अत्यंत गंभीर बाब असून सरकारने याकडे केवळ आश्वासनांच्या पातळीवर न पाहता तातडीने निर्णय घेऊन शेतकऱ्यांना न्याय द्यावा.
” ते पुढे म्हणाले की, “शेतकरी हा देशाचा कणा आहे. त्याच्या घामाचे मोल मिळाले नाही तर शेती व्यवस्था कोलमडून जाईल. पिकविमा योजना ही शेतकऱ्यांसाठी आधार ठरणारी योजना आहे. मात्र, प्रशासकीय अडथळे, कागदोपत्री विलंब आणि निष्काळजीपणामुळे अनेक शेतकरी आर्थिक मदतीपासून वंचित राहिले आहेत. ही परिस्थिती स्वीकारार्ह नाही.” वडेट्टीवार यांनी स्पष्ट केले की, आंदोलनाचा उद्देश कोणत्याही प्रकारचा राजकीय लाभ मिळवणे नसून, शेतकऱ्यांच्या हक्कासाठी सरकारला जागे करणे हा आहे. आंदोलनाची गंभीरता लक्षात घेऊन कृषिमंत्र्यांनी तातडीने संवाद साधला आणि रखडलेल्या पिकविमा प्रकरणात लवकर निर्णय घेऊन आवश्यक कार्यवाही करण्याचे आश्वासन दिले. या आश्वासनाचा मान राखत आंदोलन सध्या स्थगित करण्यात आले आहे. मात्र, त्यांनी सरकारला स्पष्ट इशाराही दिला. “आश्वासनानंतरही प्रत्यक्ष कार्यवाही झाली नाही, शेतकऱ्यांना कविम्याचा लाभ मिळण्यात आणखी विलंब झाला किंवा प्रशासनाने दिरंगाई केली, तर आम्ही पुन्हा अधिक तीव्र आंदोलन उभारू. शेतकऱ्यांच्या हक्कासाठी कोणताही संघर्ष करण्यास आम्ही मागे हटणार नाही,” असे विजय वडेट्टीवार यांनी ठामपणे सांगितले. या आंदोलनामुळे यवतमाळ जिल्ह्यातील पिकविम्याच्या प्रश्नाला राज्यस्तरावर पुन्हा एकदा महत्त्व प्राप्त झाले असून, आता सरकार प्रत्यक्षात किती वेगाने निर्णय घेते याकडे शेतकरी आणि सर्वसामान्य नागरिकांचे लक्ष लागले आहे. शेतकऱ्यांना न्याय मिळेपर्यंत काँग्रेस त्यांच्या पाठीशी ठामपणे उभी राहील, असा विश्वासही विजय वडेट्टीवार यांनी व्यक्त केला.
