Desk | Mumbai

केंद्रातील पंतप्रधान नरेंद्र मोदी यांच्या नेतृत्वाखालील सरकारला 12 वर्षे पूर्ण झाल्याच्या पार्श्वभूमीवर काँग्रेस विधीमंडळ पक्षनेते विजय वडेट्टीवार यांनी सरकारच्या कामकाजावर कठोर शब्दांत टीका केली आहे. “12 वर्षांत यांनी पूर्ण देशाचे 12 वाजवले,” असे म्हणत वडेट्टीवार यांनी महागाई, बेरोजगारी आणि शेतकऱ्यांच्या प्रश्नांवरून केंद्र सरकारला धारेवर धरले. माध्यमांशी संवाद साधताना वडेट्टीवार म्हणाले की, गेल्या 12 वर्षांत केंद्र सरकारने विकासाच्या मोठमोठ्या घोषणा केल्या, मात्र प्रत्यक्षात सर्वसामान्य नागरिकांचे जीवन अधिक कठीण झाले आहे. पेट्रोल-डिझेलपासून ते जीवनावश्यक वस्तूंपर्यंत सर्वच गोष्टींच्या किमती वाढल्या असून, महागाईमुळे सामान्य कुटुंबांचे आर्थिक गणित कोलमडले असल्याचा आरोप त्यांनी केला. युवकांच्या रोजगाराच्या प्रश्नावरही त्यांनी सरकारवर निशाणा साधला. देशातील लाखो सुशिक्षित तरुण आजही नोकरीच्या शोधात भटकत असून, रोजगारनिर्मितीच्या बाबतीत सरकार अपयशी ठरल्याचे ते म्हणाले.

तसेच, शेतकऱ्यांच्या समस्या दिवसेंदिवस वाढत असून, शेतीमालाला योग्य भाव मिळत नसल्याने ग्रामीण अर्थव्यवस्था संकटात सापडल्याचेही त्यांनी सांगितले. वडेट्टीवार यांनी यावेळी देशाचे पहिले पंतप्रधान जवाहरलाल नेहरू यांच्या कार्याचा उल्लेख करत, स्वातंत्र्यानंतर अत्यंत मर्यादित संसाधने असतानाही देशाच्या विकासाचा मजबूत पाया रचण्यात आला होता, असे मत व्यक्त केले. मात्र आज सर्व प्रकारच्या सुविधा उपलब्ध असूनही जनतेच्या मूलभूत प्रश्नांकडे दुर्लक्ष होत असल्याचा आरोप त्यांनी केला. “जनतेला दिलेली अनेक आश्वासने आजही अपूर्ण आहेत. देशाच्या प्रगतीचे चित्र रंगवले जात असले, तरी वास्तवात शेतकरी, कामगार, युवक आणि मध्यमवर्गीय नागरिक अनेक समस्यांशी संघर्ष करत आहेत. सरकारची 12 वर्षे पूर्ण झाली असली, तरी देशाचेच 12 वाजले आहेत,” असा घणाघात वडेट्टीवार यांनी केला. त्यांच्या या वक्तव्यानंतर राज्याच्या राजकीय वर्तुळात चर्चांना उधाण आले आहे. आगामी निवडणुकांच्या पार्श्वभूमीवर विरोधकांकडून केंद्र सरकारवर टीकेची धार अधिक तीव्र होण्याची शक्यता व्यक्त केली जात आहे. दुसरीकडे, सत्ताधारी पक्षाकडून या आरोपांना प्रत्युत्तर दिले जाण्याचीही शक्यता आहे.