Join us
Desk | Mumbai
मुंबईत भाजपच्या आंदोलनाला सुरुवात होत असताना आंदोलनस्थळी विद्यार्थ्यांची मोठी गर्दी पाहायला मिळत आहे. दादर येथील शिवसेना भवन परिसरापासून शिवाजी पार्ककडे जाणाऱ्या रस्त्यावर विद्यार्थी, ज्येष्ठ नागरिक आणि विविध कार्यकर्ते मोठ्या संख्येने जमा झाल्याचे चित्र आहे. आंदोलनस्थळी देशभक्तीपर गाणी सुरू असून अनेकांच्या हातात तिरंगा दिसत आहे. आंदोलनासाठी मोठे व्यासपीठ उभारण्यात आले असून मंचाच्या परिसरातही हळूहळू गर्दी वाढताना दिसत आहे. शिवसेना भवन ते शिवाजी पार्क या मार्गावर मोठ्या संख्येने विद्यार्थी सहभागी झाल्याचे सांगण्यात येत आहे. काही ज्येष्ठ नागरिकांनीही आंदोलनात सहभाग घेतल्याचे दिसून आले. आंदोलनस्थळी विविध पोस्टर्स आणि बॅनर्स लावण्यात आले आहेत. तसेच भगतसिंग यांच्या नावाने सुरू असलेल्या आंदोलनातही काही कार्यकर्ते सहभागी झाल्याचे दिसून आले.
यावेळी शेकापच्या एका कार्यकर्त्याने आंदोलनाला समर्थन असल्याचे सांगितले. निवडणूक प्रक्रियेबाबत आणि निवडणूक आयोगाच्या भूमिकेबाबत उपस्थितांकडून प्रश्न उपस्थित करण्यात येत असल्याचेही समोर आले. दरम्यान, पोलिसांकडून या आंदोलनाला परवानगी देण्यात आली नसल्याचे सांगण्यात आले होते. त्यामुळे आंदोलनस्थळी पोलिसांचा मोठा बंदोबस्त तैनात करण्यात आला आहे. कोणताही अनुचित प्रकार घडू नये, यासाठी पोलीस प्रशासनाकडून परिस्थितीवर लक्ष ठेवण्यात येत आहे. विशेष म्हणजे, आंदोलनाच्या ठिकाणी विद्यार्थी आणि पोलिसांमध्ये समन्वयाचे चित्रही पाहायला मिळत आहे. काही विद्यार्थी पोलिसांचे आभार मानताना दिसून आले. त्यामुळे मोठी गर्दी असतानाही परिस्थिती नियंत्रणात ठेवण्यासाठी पोलीस आणि आंदोलकांमध्ये संवाद सुरू असल्याचे चित्र आहे. शिवाजी पार्क परिसरात आंदोलनासाठी गर्दी वाढत असल्याने मुंबईतील या आंदोलनाकडे सर्वांचे लक्ष लागले आहे. मंचावर कार्यक्रमाला सुरुवात होत असताना परिसरात घोषणाबाजी आणि देशभक्तीपर वातावरण निर्माण झाले आहे. पुढील काळात आंदोलनाला आणखी किती प्रतिसाद मिळतो आणि प्रशासनाकडून काय भूमिका घेतली जाते, याकडे लक्ष राहणार आहे.
