Join us
Desk | Gondia
शहरातील रस्त्यांवर मॉडिफाय केलेल्या ‘फटाका सायलेन्सर’मुळे कर्णकर्कश आवाज करत धुमाकूळ घालणाऱ्या दुचाकीस्वारांवर गोंदिया पोलिसांनी अखेर धडक कारवाई केली आहे. नागरिकांच्या तक्रारींची गंभीर दखल घेत जिल्हा वाहतूक शाखेने विशेष मोहीम राबवली. या कारवाईत फटाक्यांसारखा मोठा आवाज करणारे मॉडिफाय सायलेन्सर बसवलेल्या ५ दुचाकी पोलिसांनी ताब्यात घेतल्या. संबंधित वाहने वाहतूक पोलीस ठाण्यात जमा करण्यात आली आहेत. फटाका सायलेन्सरच्या कर्णकर्कश आवाजामुळे लहान मुले, ज्येष्ठ नागरिक, रुग्ण आणि सर्वसामान्य नागरिकांना मोठा त्रास सहन करावा लागत असल्याच्या तक्रारी पोलिसांकडे येत होत्या. त्यामुळे अशा वाहनचालकांविरोधात आता पोलिसांनी कठोर
भूमिका घेतली आहे. या मोहिमेत पोलीस अधिकारी आणि वाहतूक शाखेच्या कर्मचाऱ्यांनी शहरातील विविध भागांत तपासणी करत नियमबाह्य सायलेन्सर असलेल्या वाहनांवर कारवाई केली. सायलेन्सर बदलून वाहनाला फटाक्यांसारखा आवाज देणे आता वाहनचालकांना चांगलेच महागात पडणार आहे. पोलिसांचा थेट इशारा ‘फटाका सायलेन्सर’ लावून रस्त्यावर दहशत निर्माण करणाऱ्यांवर यापुढेही कारवाई सुरूच राहणार, असा स्पष्ट इशारा पोलिसांनी दिला आहे. गोंदिया पोलिसांच्या अधिकृत संकेतस्थळावरही वाहतूक आणि नागरिकांच्या सुरक्षिततेसंदर्भात विविध उपक्रमांची माहिती प्रसिद्ध करण्यात आली आहे.
