Join us
Desk | Amravati
अमरावती जिल्ह्यातील दुचाकी चोरीच्या घटनांना आळा घालण्यासाठी पोलिसांनी मोठी कारवाई केली आहे. अट्टल दुचाकी चोरट्याला पोलिसांनी बेड्या ठोकल्या असून, त्याच्याकडून तब्बल पाच चोरीच्या दुचाकी हस्तगत करण्यात आल्या आहेत. पोलिसांनी दिलेल्या माहितीनुसार, इमरान उर्फ इमली इस्माईल खाँ, वय ३६ वर्षे, रा. कुन्हा, ता. तिवसा, जि. अमरावती, असे अटक करण्यात आलेल्या आरोपीचे नाव आहे. आरोपीकडून पोलिसांनी सुमारे अडीच लाख रुपये किमतीच्या पाच दुचाकी जप्त केल्या आहेत. एलसीबीचे पथक ३ सप्टेंबर रोजी पेट्रोलिंग करत असताना पोलिसांना गुप्त बातमीदारामार्फत महत्त्वाची माहिती मिळाली. इमरान उर्फ इमली हा चोरीची दुचाकी घेऊन बाभूळगाव मार्गाने जाणार असल्याची माहिती पोलिसांना मिळाली. या माहितीच्या आधारे पोलिसांनी तातडीने कारवाईचे नियोजन केले. पोलिसांनी धामणगाव रोडवरील करळगाव घाट परिसरात सापळा रचला. काही वेळातच संशयित आरोपी दुचाकीसह पोलिसांच्या हाती लागला. त्याची चौकशी केली असता त्याने दुचाकी चोरी केल्याची कबुली दिल्याची माहिती पोलिसांनी दिली. त्यानंतर पोलिसांनी आरोपीकडे अधिक तपास केला असता यवतमाळ बसस्थानक, कोतवाली आणि पुलगाव परिसरातून दुचाकी चोरी केल्याचे समोर आले.
आरोपीच्या माहितीवरून पोलिसांनी आणखी चोरीच्या दुचाकी शोधून काढल्या आणि एकूण पाच दुचाकी जप्त केल्या. या कारवाईमुळे दुचाकी चोरीच्या अनेक घटनांचा तपास पुढे जाण्याची शक्यता आहे. आरोपीने आणखी कुठे-कुठे चोरी केली आहे का, त्याच्यासोबत या गुन्ह्यात आणखी कोणाचा सहभाग आहे का, याचा तपास सध्या पोलिसांकडून सुरू आहे. दुचाकी चोरीच्या वाढत्या घटनांच्या पार्श्वभूमीवर पोलिसांच्या या कारवाईमुळे चोरट्यांमध्ये खळबळ उडाली आहे. नागरिकांनी आपल्या वाहनांच्या सुरक्षेबाबत अधिक सतर्क राहावे आणि संशयास्पद हालचाली आढळल्यास तातडीने पोलिसांना माहिती द्यावी, असे आवाहन करण्यात येत आहे. दरम्यान, अटक करण्यात आलेल्या आरोपीकडून आणखी चोरीचे गुन्हे उघडकीस येतात का, याकडे आता पोलिसांसह नागरिकांचे लक्ष लागले आहे.
