Join us
desk | Mumbai
महायुती सरकारमधील अंतर्गत मतभेद पुन्हा एकदा उघड झाल्याचे चित्र दिसत असून, विरोधी पक्षनेते विजय वडेट्टीवार यांनी मंत्री अब्दुल सत्तार यांच्या वक्तव्याचा आधार घेत सरकारवर जोरदार हल्लाबोल केला आहे. निधी वाटप आणि पालकमंत्र्यांच्या कामकाजावर नाराजी व्यक्त करताना सत्तार यांनी “आमचा पालकमंत्री असून आम्हालाच न्याय मिळत नसेल, तर आम्ही जायचे कुठे?” अशी खंत व्यक्त केली होती. त्यांच्या या विधानावर प्रतिक्रिया देताना वडेट्टीवार यांनी सत्तार यांना थेट लक्ष्य केले. वडेट्टीवार म्हणाले की, अब्दुल सत्तार हे सरकारमधील वरिष्ठ मंत्री आहेत. ते स्वतः सत्तेचा भाग असताना जर त्यांनाच न्याय मिळत नसल्याची भावना असेल, तर हे सरकारच्या अपयशाचे लक्षण आहे. “सरकारमध्ये राहून सरकारविरोधात बोलण्यापेक्षा भूमिका स्पष्ट करावी. जर खरोखरच अन्याय होत असेल, तर मग महायुतीत राहता कशाला?” असा सवाल त्यांनी उपस्थित केला. ते पुढे म्हणाले की, राज्य सरकार विकासकामे, निधी आणि प्रशासनात समन्वय असल्याचा दावा करत असते. मात्र, मंत्रिमंडळातील सदस्यच सार्वजनिकरित्या नाराजी व्यक्त करत असतील,
तर सरकारमध्ये सर्व काही आलबेल नसल्याचे स्पष्ट होते. महायुतीतील अनेक नेत्यांमध्ये समन्वयाचा अभाव असून, त्याचे परिणाम आता उघडपणे दिसू लागले आहेत, असा आरोपही त्यांनी केला. वडेट्टीवार यांनी सत्तार यांच्या वक्तव्यावरून मुख्यमंत्री आणि महायुती नेतृत्वालाही लक्ष्य केले. सरकारमध्येच एकमेकांविषयी अविश्वास आणि नाराजी असेल, तर सामान्य नागरिकांच्या प्रश्नांचे निराकरण कसे होणार, असा प्रश्न त्यांनी उपस्थित केला. राज्यातील शेतकरी, बेरोजगार, महिला आणि सर्वसामान्य नागरिक विविध समस्यांशी झुंज देत असताना सत्ताधारी नेते मात्र आपापसातील वादांमध्ये व्यस्त असल्याची टीकाही त्यांनी केली. दरम्यान, अब्दुल सत्तार यांच्या विधानामुळे महायुतीतील अंतर्गत संघर्ष पुन्हा चर्चेत आला आहे. आगामी स्थानिक स्वराज्य संस्था निवडणुका आणि इतर राजकीय घडामोडींच्या पार्श्वभूमीवर सत्ताधारी आघाडीतील नेत्यांमधील मतभेद अधिक तीव्र होत असल्याची चर्चा राजकीय वर्तुळात सुरू आहे. विरोधकांनीही या संधीचा फायदा घेत सरकारवर दबाव वाढवण्यास सुरुवात केली आहे.
