Join us
Desk | Nagpur
नागपूरमध्ये स्विमिंग पूलमध्ये बुडून सात वर्षीय बालकाचा दुर्दैवी मृत्यू; रिसॉर्ट व्यवस्थापनाविरोधात गुन्हा नागपूर जिल्ह्यातील कोंढाळी पोलीस ठाण्याच्या हद्दीत एका खाजगी रिसॉर्टमधील स्विमिंग पूलमध्ये बुडून सात वर्षीय बालकाचा दुर्दैवी मृत्यू झाल्याची घटना समोर आली आहे. वाई शिवारातील एका रिसॉर्टमध्ये ही घटना घडली. या घटनेनंतर परिसरात हळहळ व्यक्त केली जात असून, बालकाच्या मृत्यूमुळे कुटुंबावर दुःखाचा डोंगर कोसळला आहे. मिळालेल्या माहितीनुसार, अभिनंदन नागरवाले हा सात वर्षीय बालक आपल्या कुटुंबीयांसह वाई शिवारातील एका खाजगी रिसॉर्टमध्ये गेला होता. कुटुंबीय रिसॉर्टमध्ये असताना दुपारी सुमारे तीन वाजण्याच्या सुमारास अभिनंदन स्विमिंग पूलमध्ये बुडाला. काही वेळाने ही बाब लक्षात आल्यानंतर त्याला तातडीने पाण्याबाहेर काढण्यात आले. बालकाला उपचारासाठी नेण्याचा प्रयत्न करण्यात आला. मात्र, उपचार मिळण्यापूर्वीच त्याचा दुर्दैवी मृत्यू झाल्याचे समोर आले. घटनेची माहिती मिळताच कुटुंबीयांमध्ये एकच खळबळ उडाली. सात वर्षांच्या चिमुकल्याचा अशा प्रकारे मृत्यू झाल्याने नागरवाले कुटुंबावर दुःखाचा डोंगर कोसळला आहे. दरम्यान, पोलिसांनी घटनेची नोंद घेत मृतदेह शवविच्छेदनासाठी पाठवला. शवविच्छेदनाची प्रक्रिया पूर्ण झाल्यानंतर मृतदेह कुटुंबीयांच्या ताब्यात देण्यात आला. त्यानंतर कुटुंबीयांनी बालकाच्या मृत्यूबाबत रिसॉर्टमधील सुरक्षा व्यवस्थेवर प्रश्न उपस्थित केले आहेत. या प्रकरणी मृतक बालकाच्या वडिलांनी कोंढाळी पोलिसांकडे तक्रार दाखल केली. या तक्रारीच्या आधारे पोलिसांनी रिसॉर्टच्या व्यवस्थापनाविरोधात गुन्हा दाखल केला आहे. स्विमिंग पूल परिसरात आवश्यक सुरक्षा व्यवस्था होती का, बालकांवर देखरेख ठेवण्यासाठी कर्मचारी उपस्थित होते का, तसेच सुरक्षेच्या नियमांचे पालन करण्यात आले होते का, याचा तपास सध्या पोलिसांकडून केला जात आहे. स्विमिंग पूलमध्ये लहान मुले असताना विशेष खबरदारी घेणे आवश्यक असते. पूल परिसरात प्रशिक्षित कर्मचारी, योग्य सुरक्षा साधने आणि सतत देखरेख असणे गरजेचे आहे.
मात्र, या रिसॉर्टमध्ये अशा प्रकारची सुरक्षा व्यवस्था नेमकी कितपत उपलब्ध होती, याचा तपास झाल्यानंतरच घटनेमागील नेमके कारण स्पष्ट होणार आहे. पोलिसांकडून रिसॉर्ट व्यवस्थापनाकडील सुरक्षाविषयक माहिती आणि घटनेच्या वेळी उपस्थित असलेल्या व्यक्तींची चौकशी केली जाण्याची शक्यता आहे. या घटनेत कोणाची निष्काळजीपणा किंवा सुरक्षा व्यवस्थेतील त्रुटी कारणीभूत ठरली का, याचा तपास महत्त्वाचा ठरणार आहे. दरम्यान, या दुर्दैवी घटनेमुळे रिसॉर्ट आणि जलतरण तलावांच्या सुरक्षेचा प्रश्न पुन्हा एकदा ऐरणीवर आला आहे. विशेषतः लहान मुलांसाठी स्विमिंग पूलमध्ये सुरक्षित वातावरण आणि पालकांच्या देखरेखीबरोबरच व्यवस्थापनाची जबाबदारीही महत्त्वाची असल्याचे या घटनेतून अधोरेखित झाले आहे.
