Join us
Desk | Gadchiroli
जिल्ह्यातील दक्षिण भागात पेट्रोल आणि डिझेलचा तुटवडा दिवसेंदिवस गंभीर होत असून याचा फटका शेतकरी, वाहनधारक आणि प्रवाशांना बसत आहे. अनेक पेट्रोल पंपांवर “नो स्टॉक”चे फलक लागले असून इंधन उपलब्ध नसल्याने नागरिकांना मोठ्या अडचणींचा सामना करावा लागत आहे. विशेषतः पावसाळ्याच्या तोंडावर निर्माण झालेल्या या परिस्थितीमुळे शेतकऱ्यांची चिंता वाढली आहे. मिळालेल्या माहितीनुसार, सिरोंचा, भामरागड, एटापल्ली, मुलचेरा तसेच चामोर्शी परिसरातील अनेक पेट्रोल पंपांवर पेट्रोल आणि डिझेलचा साठा संपल्याने वाहनचालकांना रिकाम्या हाताने परत जावे लागत आहे. काही पंपांवर गेल्या अनेक दिवसांपासून इंधनाचा पुरवठा नियमित होत नसल्याचे स्थानिक नागरिकांनी सांगितले. गडचिरोलीच्या दक्षिण भागातून छत्तीसगड सीमेच्या दिशेने प्रवास करणाऱ्या वाहनांसाठी हा परिसर महत्त्वाचा मानला जातो. या मार्गावरील काही मोजकेच पेट्रोल पंप प्रवाशांच्या इंधनाच्या गरजा पूर्ण करतात. मात्र सध्या या पंपांवरही इंधनाचा तुटवडा असल्याने लांब पल्ल्याचा प्रवास करणाऱ्या वाहनधारकांना मोठा त्रास सहन करावा लागत आहे. दरम्यान, पावसाळ्याची सुरुवात झाल्याने आता शेतीच्या कामांना वेग येणार आहे.
जिल्हा प्रशासनानेही हवामानातील बदल लक्षात घेऊन जून अखेरनंतर शेतीच्या कामांना सुरुवात करण्याचे आवाहन केले आहे. अशा परिस्थितीत ट्रॅक्टर, पंपसेट आणि इतर कृषी यंत्रांसाठी मोठ्या प्रमाणात डिझेलची गरज भासणार आहे. मात्र डिझेल उपलब्ध नसल्याने शेतकरी वर्ग चिंतेत सापडला आहे. स्थानिक शेतकऱ्यांचे म्हणणे आहे की, पेरणीपूर्व मशागतीची कामे सुरू करण्यासाठी ट्रॅक्टरची आवश्यकता असते. डिझेलअभावी ही कामे वेळेत पूर्ण होणार की नाही, याबाबत अनिश्चितता निर्माण झाली आहे. आधीच हवामानाच्या लहरीपणामुळे शेतकरी संकटात असताना आता इंधनटंचाईमुळे त्यांच्या अडचणीत आणखी भर पडली आहे. वाहनचालक आणि व्यापारी वर्गालाही या परिस्थितीचा मोठा फटका बसत आहे. इंधन मिळवण्यासाठी अनेकांना लांब अंतरावरील पेट्रोल पंपांवर जावे लागत असून त्यामुळे वेळ आणि पैशांचा अतिरिक्त खर्च होत आहे. काही ठिकाणी इंधन उपलब्ध असल्याची माहिती मिळाल्यानंतर वाहनांच्या रांगा लागल्याचेही चित्र पाहायला मिळत आहे. या पार्श्वभूमीवर दक्षिण गडचिरोलीतील नागरिक, शेतकरी आणि प्रवासी यांनी प्रशासनाकडे तातडीने इंधनपुरवठा सुरळीत करण्याची मागणी केली आहे. पेट्रोल पंपांवर नियमित साठा उपलब्ध करून देण्यात यावा, तसेच ग्रामीण आणि दुर्गम भागांना प्राधान्याने इंधन पुरवठा करण्यात यावा, अशी मागणी स्थानिकांकडून जोर धरत आहे. दरम्यान, प्रशासन आणि संबंधित तेल कंपन्यांकडून इंधनटंचाई दूर करण्यासाठी कोणती पावले उचलली जातात, याकडे संपूर्ण जिल्ह्याचे लक्ष लागले आहे. शेतकरी आणि सर्वसामान्य नागरिकांना दिलासा देण्यासाठी तातडीने उपाययोजना होण्याची गरज व्यक्त केली जात आहे.
