Join us
Desk | Akola
नोकरीच्या शोधात असलेल्या युवकांना सरकारी नोकरीचे आमिष दाखवून आर्थिक फसवणूक करणाऱ्या प्रकरणात धक्कादायक माहिती समोर आली आहे. स्वाती जुनगडे नावाच्या महिलेने लिपिक पदावर नियुक्ती मिळवून देण्याचे आश्वासन देत एका व्यक्तीकडून लाखो रुपये उकळल्याचा आरोप करण्यात आला आहे. या प्रकरणी जुने शहर पोलीस ठाण्यात गुन्हा दाखल करण्यात आला असून, आरोपी महिला सध्या फरार आहे. मिळालेल्या माहितीनुसार, स्वाती जुनगडे हिने संबंधित व्यक्तीशी संपर्क साधून सरकारी विभागात लिपिक पदावर निश्चित नोकरी मिळवून देण्याचे आश्वासन दिले होते. नोकरीची प्रक्रिया पूर्ण करण्यासाठी फायनल इंटरव्ह्यू, मेडिकल तपासणी, कागदपत्र पडताळणी तसेच जॉइनिंग ऑर्डर काढण्यासाठी खर्च येणार असल्याचे सांगत तिने टप्प्याटप्प्याने मोठी रक्कम स्वीकारली.
या संपूर्ण प्रक्रियेदरम्यान संबंधित व्यक्तीकडून जवळपास दोन लाख रुपयांची रक्कम उकळण्यात आल्याचा आरोप करण्यात आला आहे. फसवणुकीला विश्वासार्ह स्वरूप देण्यासाठी आरोपी महिलेने संबंधित व्यक्तीला नियुक्ती आदेश आणि ओळखपत्र देखील उपलब्ध करून दिले होते. त्यामुळे आपली निवड झाल्याचा विश्वास पीडित व्यक्तीला बसला होता. मात्र, काही कारणास्तव संबंधित कागदपत्रांची अधिकृत स्तरावर चौकशी करण्यात आली असता, जॉइनिंग ऑर्डर आणि ओळखपत्र पूर्णपणे बनावट असल्याचे उघड झाले. आपली फसवणूक झाल्याचे लक्षात येताच पीडित व्यक्तीने तात्काळ जुने शहर पोलीस ठाणे गाठून तक्रार दाखल केली. तक्रारीच्या आधारे पोलिसांनी स्वाती जुनगडे हिच्याविरोधात फसवणुकीसह बनावट कागदपत्रांचा वापर केल्याप्रकरणी विविध कलमांन्वये गुन्हा नोंदवला आहे. दरम्यान, गुन्हा दाखल झाल्याची माहिती मिळताच आरोपी महिला फरार झाली असून, तिचा शोध घेण्यासाठी पोलिसांनी विशेष पथके तयार केली आहेत. आरोपीच्या संभाव्य ठिकाणांची तपासणी केली जात असून, या प्रकरणाचा अधिक तपास जुने शहर पोलीस करीत आहेत. या घटनेमुळे नोकरीच्या नावाखाली सुरू असलेल्य फसवणुकीच्या प्रकारांबाबत गंभीर चिंता व्यक्त केली जात आहे. बेरोजगार युवकांच्या असहाय्यतेचा फायदा घेत काही जण सरकारी नोकरी मिळवून देण्याच्या नावाखाली लाखो रुपयांची उकळपट्टी करत असल्याचे प्रकार वारंवार समोर येत आहेत. त्यामुळे कोणत्याही नोकरीसाठी पैसे देण्यापूर्वी संबंधित संस्थेची अधिकृत माहिती तपासणे, नियुक्ती प्रक्रियेची खातरजमा करणे आणि संशयास्पद व्यवहारांपासून दूर राहणे आवश्यक असल्याचे आवाहन पोलिसांकडून करण्यात आले आहे.या प्रकरणात आणखी काही जणांची फसवणूक झाली आहे का, याचाही तपास पोलीस करीत असून, आरोपी महिलेच्या अटकेनंतर या प्रकरणातील इतर धक्कादायक बाबी समोर येण्याची शक्यता व्यक्त केली जात आहे.
