Join us
DESK | GONDIYA
सुशिक्षित बेरोजगारांना मोठ्या पगाराच्या नोकरीचे स्वप्न दाखवून लुबाडणाऱ्या टोळ्या सध्या सक्रिय आहेत. अशाच एका टोळीने गोंदियातील एका उच्चशिक्षित इंजिनिअर तरुणाला ‘प्रोजेक्ट मॅनेजर’ पदाचे आमिष दाखवून तब्बल २ लाख ८५ हजार ६०० रुपयांना गंडा घातला आहे. याप्रकरणी शहर पोलिसांनी अज्ञात आरोपींविरुद्ध फसवणुकीचा गुन्हा दाखल केला आहे.
नेमकी घटना काय?
तक्रारदार उज्ज्वल रहांगडाले (वय ३२, रा. अशोक कॉलनी, गोंदिया) हे पेशाने अभियंता आहेत. बंगलोर येथे नोकरी केल्यानंतर जानेवारी २०२५ पासून ते घरीच होते. १५ मार्च २०२६ रोजी त्यांना एका अज्ञात क्रमांकावरून कॉल आला. फोनवरील ‘पायल शर्मा’ नावाच्या महिलेने आपण दिल्लीतील ‘फाउंड इट’ कंपनीतून बोलत असल्याचे भासवले. तिने ‘सिमेन्स’ सारख्या नामांकित कंपनीत प्रोजेक्ट मॅनेजर पदासाठी भरती सुरू असल्याचे सांगून उज्ज्वल यांचा विश्वास संपादन केला.
अशा प्रकारे लुटले पैसे
आरोपींनी उज्ज्वल यांना नोकरी मिळवून देण्याच्या बहाण्याने वेगवेगळ्या टप्प्यांवर पैशांची मागणी केली:
-
सुरुवात: प्रथम मेंबरशिप फी म्हणून ६,५०० रुपये घेतले.
-
ट्रेनिंग व व्हेरिफिकेशन: त्यानंतर इंटरव्ह्यू झाल्याचे सांगून ट्रेनिंग फी (६२,५०० रुपये) आणि बॅकग्राउंड व्हेरिफिकेशन (७०,५०० रुपये) उकळले.
-
इतर शुल्क: मेडिकल स्क्रीनिंग (९८,५०० रुपये) आणि फायनल डॉक्युमेंटेशन (४७,५०० रुपये) अशा नावाखाली एकूण २,८५,६०० रुपये ऑनलाइन ट्रान्सफर करून घेतले.
फसवणूक कशी उघडकीस आली?
इतके पैसे दिल्यानंतरही आरोपींचे समाधान झाले नाही. त्यांनी पुन्हा ३ लाख ५५ हजार रुपयांची मागणी केली. वारंवार होणाऱ्या पैशांच्या मागणीमुळे उज्ज्वल यांना संशय आला. त्यांनी संबंधित क्रमांकावर संपर्क साधण्याचा प्रयत्न केला असता कोणताही प्रतिसाद मिळाला नाही. आपली फसवणूक झाल्याचे लक्षात येताच त्यांनी तातडीने ‘१९३०’ या सायबर क्राईम हेल्पलाइनवर तक्रार केली आणि त्यानंतर गोंदिया शहर पोलिसांत धाव घेतली.
सायबर पोलिसांचे आवाहन
नोकरी देणारी कोणतीही अधिकृत कंपनी उमेदवाराकडून पैशांची मागणी करत नाही. जर कोणी पैशांची मागणी करत असेल, तर तो फसवणुकीचा प्रकार असू शकतो. अशा वेळी सावध राहावे आणि कोणत्याही अनोळखी खात्यावर पैसे जमा करू नयेत, असे आवाहन पोलिसांनी केले आहे.
