Desk | Nagpur

FSI घोटाळ्यावर विजय वडेट्टीवारांचा सरकारवर हल्लाबोल; “१ लाख कोटींच्या गैरव्यवहाराची चौकशी करा” राज्यातील बांधकाम क्षेत्रातील कथित गैरव्यवहार, एफएसआय (Floor Space Index), टीडीआर (Transferable Development Rights) आणि एसआरए (झोपडपट्टी पुनर्वसन प्राधिकरण) घोटाळ्यांवरून काँग्रेस नेते विजय वडेट्टीवार यांनी राज्य सरकारवर जोरदार टीका केली आहे. काही बिल्डर प्रकरणांमध्ये कोट्यवधी रुपयांच्या अनियमितता समोर येत असताना, प्रत्यक्षात एफएसआयशी संबंधित घोटाळे हजारो कोटींच्या घरात असल्याचा गंभीर आरोप वडेट्टीवार यांनी केला आहे. विजय वडेट्टीवार म्हणाले की, “युनिकॉर्न बिल्डरने १०० कोटी रुपयांपेक्षा अधिक एफएसआयचा घोटाळा केला असल्याचे समोर आले आहे. मात्र हा केवळ एक छोटा भाग आहे. राज्यात एफएसआयच्या नावावर तब्बल १ लाख कोटी रुपयांपर्यंतचे घोटाळे झाले असण्याची शक्यता आहे. सरकारने याची सखोल चौकशी करण्याची गरज आहे.” एफएसआय, टीडीआर आणि एसआरए योजनांमध्ये मोठ्या प्रमाणावर अनियमितता झाल्याचा आरोप करत वडेट्टीवार यांनी सरकारच्या भूमिकेवर प्रश्नचिन्ह उपस्थित केले. “टीडीआर घोटाळा, एफएसआय घोटाळा आणि एसआरए घोटाळे हे अत्यंत गंभीर स्वरूपाचे आहेत. हे केवळ आर्थिक गैरव्यवहार नाहीत, तर शहरांच्या विकासाशी आणि सामान्य नागरिकांच्या हक्कांशी संबंधित प्रश्न आहेत,” असे ते म्हणाले. पुण्यातील टीडीआर व्यवहारांवर भाष्य करताना वडेट्टीवार यांनी मोठा आरोप केला. “पुण्यामध्ये जवळपास २ हजार कोटी रुपयांचा टीडीआर घोटाळा उघडकीस आला होता. एका माध्यमाने हे संपूर्ण प्रकरण समोर आणले, मात्र त्यानंतरही सरकारकडून कोणतीही ठोस कारवाई करण्यात आली नाही,”

असा दावा त्यांनी केला. यावेळी त्यांनी एसआरए विभागातील कथित भ्रष्टाचारावरही निशाणा साधला. “एसआरए विभागातील काही अधिकारी, वार्ड अधिकारी आणि संबंधित यंत्रणांमध्ये संगनमत असल्याचा संशय आहे. बदल्यांपासून ते निर्णय प्रक्रियेपर्यंत अनेक गंभीर प्रश्न निर्माण झाले आहेत. काही अधिकारी एकदा एसआरएमध्ये गेले की ते वर्षानुवर्षे तिथेच राहतात. त्यामुळे या व्यवस्थेत मोठे रॅकेट कार्यरत असल्याची शक्यता आहे,” असे वडेट्टीवार म्हणाले. मुंबई आणि इतर शहरांमध्ये अनधिकृत बांधकामे, विकास प्रकल्प आणि पुनर्वसन योजनांमध्ये पारदर्शकता नसल्याचा आरोप करत त्यांनी सरकारला जाब विचारला. “इतके मोठे घोटाळे समोर येत असताना सरकारने मौन बाळगणे योग्य नाही. जनतेच्या पैशांचा आणि शहरांच्या भवितव्याचा प्रश्न आहे. सरकारने तातडीने स्वतंत्र चौकशी करावी आणि दोषींवर कठोर कारवाई करावी,” अशी मागणी त्यांनी केली. दरम्यान, एफएसआय आणि टीडीआर व्यवहारांमध्ये पारदर्शकता आणण्यासाठी स्वतंत्र यंत्रणेमार्फत चौकशी करण्याची मागणी काँग्रेसकडून करण्यात येत आहे. शहर विकासाशी संबंधित या प्रकरणांवर आगामी काळात राजकीय वातावरण आणखी तापण्याची शक्यता आहे. विजय वडेट्टीवार यांच्या आरोपांमुळे राज्यातील बांधकाम क्षेत्रातील कथित गैरव्यवहाराचा मुद्दा पुन्हा एकदा चर्चेत आला असून, सरकार यावर काय भूमिका घेते याकडे सर्वांचे लक्ष लागले आहे.