Join us
Desk | Nagpur
नागपूर शहरात घरफोडीच्या वाढत्या घटनांमुळे नागरिकांमध्ये भीतीचे वातावरण निर्माण झाले आहे. चोरटे आता इतके निर्ढावले आहेत की, घरातील सदस्य झोपेत असतानाही चोरी करण्यास मागेपुढे पाहत नाहीत. अशाच एका धक्कादायक घटनेने टिमकी परिसरातील चिमाबाई पेठेतील रहिवाशांची झोप उडवली आहे. एका अज्ञात चोरट्याने एका रात्रीत तब्बल पाच घरांचे कुलूप तोडून चोरीचा प्रयत्न केल्याची घटना समोर आली आहे. विशेष म्हणजे हा संपूर्ण प्रकार परिसरातील सीसीटीव्ही कॅमेऱ्यात कैद झाला असून, त्या आधारे तहसील पोलीस संशयिताचा शोध घेत आहेत. मिळालेल्या माहितीनुसार, टिमकी येथील चिमाबाई पेठ परिसरात राहणारे आकाश सूर्यवंशी हे एमएसएफमध्ये कार्यरत आहेत. घटनेच्या रात्री ते नियमित कर्तव्यावर गेले होते. दरम्यान, त्यांच्या कुटुंबातील सदस्य घराच्या पहिल्या मजल्यावर झोपलेले होते. घराच्या खालच्या मजल्याला कुलूप लावण्यात आले होते. याच संधीचा फायदा घेत मध्यरात्रीच्या सुमारास अज्ञात चोरट्याने घराच्या मुख्य दरवाजाचे कुलूप तोडून आत प्रवेश केला. घरात प्रवेश केल्यानंतर चोरट्याने घरातील मौल्यवान वस्तूंवर हात साफ केल्याची माहिती समोर आली आहे. चोरी केल्यानंतरही त्याची हिंमत वाढली आणि त्याने परिसरातील आणखी चार घरांना लक्ष्य केले.
दीपक गुटकेवार, पुंडलिक गोडपागे आणि गोपाल रणदिवे यांच्या घरांसह एकूण पाच घरांची कुलपे तोडण्यात आली. मात्र, इतर घरांमधून चोरट्यांच्या हाती विशेष काही लागले नसल्याचे सांगण्यात येत आहे. सकाळी ड्युटीवरून परतल्यानंतर आकाश सूर्यवंशी यांच्या निदर्शनास घराचे तुटलेले कुलूप आणि चोरी झाल्याची बाब आली. त्यांनी तात्काळ तहसील पोलिसांना घटनेची माहिती दिली. माहिती मिळताच पोलिसांनी घटनास्थळी धाव घेत पंचनामा केला आणि शिवण पथकाच्या मदतीने परिसरात तपास सुरू केला. तपासादरम्यान परिसरातील विविध ठिकाणांवरील सीसीटीव्ही फुटेजची पाहणी करण्यात आली. या फुटेजमध्ये संशयित चोर स्पष्टपणे दिसून आला आहे. त्याच्या हालचाली आणि ओळख पटविण्याचे काम पोलीस करत असून, फुटेजच्या आधारे त्याचा शोध सुरू करण्यात आला आहे. लवकरच आरोपीला अटक करण्यात येईल, असा विश्वास पोलिसांकडून व्यक्त करण्यात येत आहे. दरम्यान, एका रात्रीत पाच घरांना लक्ष्य करण्यात आल्याने परिसरातील नागरिकांमध्ये भीती आणि संतापाचे वातावरण आहे. रात्रीच्या वेळी पोलिसांची गस्त वाढवावी, संवेदनशील भागांमध्ये विशेष लक्ष द्यावे आणि घरफोडी करणाऱ्या टोळ्यांवर कठोर कारवाई करावी, अशी मागणी स्थानिक रहिवाशांनी केली आहे. नागपूर शहरात वाढत्या घरफोडीच्या घटनांमुळे नागरिकांच्या सुरक्षेचा प्रश्न पुन्हा एकदा ऐरणीवर आला आहे. सीसीटीव्हीच्या मदतीने तपासाला गती मिळाली असली, तरी अशा घटनांना आळा घालण्यासाठी पोलीस प्रशासनाने अधिक प्रभावी उपाययोजना करण्याची गरज व्यक्त केली जात आहे. सध्या तहसील पोलीस सीसीटीव्ही फुटेजच्या आधारे पुढील तपास करत असून आरोपीचा शोध युद्धपातळीवर सुरू आहे.
